Presidentja e vendit, Vjosa Osmani, ka thënë se Kosova qëndron krah Ukrainës, pasi e di se si është të paguash çmimin më të lartë për lirinë.
Në dyvjetorin e pushtimit rus të Ukrainës, Osmani ka shkruar se liria do të mbizotërojë përsëri, përcjell teve1.info.
“Ne qëndrojmë me Ukrainën sepse e dimë se si është të paguash çmimin më të lartë për lirinë. Ne e dimë dhimbjen e humbjes së fëmijëve të pafajshëm; të dhunës seksuale gjatë luftës; e varreve masive me eshtrat e njerëzve tanë të dashur. Por liria fitoi dhe do të mbizotërojë përsëri! Slava Ukraina!”, ka shkruar ajo.
Sot janë bërë dy vjet nga fillimi i luftës në Ukrainë. Rusia ka nisur pushtimin e paprovokuar të Ukrainës më 24 shkurt të vitit 2022.
Kosova është në mesin e shteteve që ka vendosur sanksione ndaj shtetit rus për shkak të pushtimit të Ukrainës./teve1.info/.