Kryeministri, Albin Kurti, ka thënë se Kosova është vendi i dytë që ratifikon tre marrëveshje nga Procesi i Berlinit. Ndërkaq, sipas tij, me 2/3 votave Kosova bëhet shteti i parë në Ballkanin Perëndimor që i ratifikon marrëveshjet në Kuvend.
Kurti ka falënderuar mbështetjen e deputetëve për ratifikimin e marrëveshjeve.
“Bashkë, sot dëshmuam se Republika jonë është për bashkëpunim të mirë rajonal dhe për progres dhe ecje të shpejtë në jetësimin e Tregut të Përbashkët Rajonal”, ka shkruar Kurti në “Facebook”.
Kurti ka thënë se marrëveshjet që janë ratifikuar sot për lëvizjen e lirë me letërnjoftime, njohjen e ndërsjellë të diplomave të arsimit të lartë dhe njohjen e ndërsjellë të profesioneve të mjekut, stomatologut dhe arkitektit në të gjashtë vendet e Ballkanit Perëndimor, do të rrisin mobilitetin e studentëve, punëtorëve dhe bizneseve do të sjellin përfitime për të gjithë.
“Shpresojmë që edhe vendet tjera nënshkruese të ndjekin ritmin e njëjtë ashtu që të mirat për qytetarët tanë të fillojnë sa më parë”, është shprehur Kurti.
