E ftuar në emisionin “Këndi i Debatit”, Imeri tha se shëndetësia është një oqean me probleme, e për të cilën ajo thotë se askush nuk po ofron zgjidhje.
“Asnjë qeveri pas luftës nuk e ka marrë si prioritet shëndetësinë, dhe kjo është për t’u habitur, pasi që e dimë të gjithë qe shëndetësia është oqean me probleme. Unë u kam thënë më herët ministrave ndoshta edhe ndonjë kryeministri një shaka por paksa edhe me thumb, që pse ta marrë qeveria si prioritet shëndetësinë kur familjarët e tyre trajtohen pa pikë problemi në cilindo shtet, sepse nuk e kanë problem as vizën, e as koston financiare”, tha tutje Imeri.
Sipas saj, ikja e mjekëve nga vendi, do të ketë pasoja të rënda deri tek shuarja e mjekësive familjare. Ajo shtoi se pagesat janë përsëri problemi kryesor i këtyre ikjeve.
“Nëse vazhdon ikja e mjekëve nga vendi do të jenë pasojat e pariparueshme, sidomos te mjekët familjarë, ku mosha e mjekëve familjarë është mbi 55 vjet, që do të thotë mjekësitë familjarë do të shuhen sepse nuk do të ketë profesionistë. Pra, edhe kjo është njëra nga problemet që duhet të shikohet me vëmendje, përsëri i tërë problemi është te pagesat”, tha ajo.
