Çollaku vlerëson se tërheqja e përfaqësuesve serb nga institucionet e Kosovës si dhe protesta e organizuar sot është në përputhje të plotë me Beogradin.
“Në cilësinë e anëtarit të Komisionit të Politikës së Jashtme në Kuvendin e Shqipërisë, si deputet dhe ne emër te Partisë Demokratike, bëjmë të ditur se: Ne po ndjekim me vëmendje situatën e krijuar ne Veri te Kosovës dhe aksionin destabilizues te strukturave paralele serbe në Mitrovicë. Ky aktivitet i koordinuar me tërheqjen e përfaqësuesve serbe nga institucionet e Kosovës duket qartësisht në përputhje te plote me Beogradin”, ka shkruar Çollaku në Facebook.
Sipas Çollakut, ky aktivitet dëshmon projektin e qartë serbo-rus për të hapur një vatër të re konflikti në Ballkan, e kjo me synim për ta cenuar integritetin territorial të Kosovës dhe copëtimin e saj, raporton teve1.info.
“Si anëtar i Komisionit të Politikës së Jashtme të Parlamentit të Shqipërise dhe në emër te Partisë Demokratike në këto kushte, ne sot jemi në mbështetje të plotë të Kosovës ,popullit dhe institucioneve te saj. Ne sot u kërkojmë qytetareve dhe institucioneve të Kosovës qëndrime gjakftohta por të vendosura, gjithashtu në koordinim të plotë me partnerët strategjike SHBA, BE dhe Nato”, thuhet tutje në postimin e tij.
Teksa, ka theksuar se Serbia me organizimin e protestës së sotme, po sillet si levë e interesave ruse në Ballkan, pasi sipas tij, ajo përbën rrezikun kryesor të destabilitetit të rajonit.
“Ne i bëjmë thirrje Qeverisë Shqiptare që të vërë në mbështetje të Qeverisë e popullit të Kosovës të gjitha kapacitetet diplomatike duke denoncuar politikat luftënxitëse të Serbisë në Ballkan. Sot, si në Kosovë dhe në Shqipëri kërkohet unitet ne qasjet politike dhe strategjike si pjesë e interesit kombëtar, në mbështetje të Kosovës dhe paqes ne rajon”, ka shtuar Çollaku.
