Instituti Kombëtar i Shëndetësisë Publike njofton se në periudhën 16 prill – 20 maj 2026, në Kosovë janë konfirmuar shtatëmbëdhjetë (17) raste të fruthit.
Sipas IKShPK-së, numri më i lartë i rasteve është shënuar në komunën e Ferizajt.
IKShPK thotë se rastet e konfirmuara janë të pavaksinuar me vaksinën MMR si dhe kanë marrë trajtim spitalor.
“Sipas komunave: numër më i lartë i rasteve raportohet nga komuna e Ferizajt gjashtë (6) raste, Prishtinës katër (4) raste, Kaçanikut tre (3) raste dhe me nga një (1) rast komunat: Lipjan, Fushë Kosovë, Gjilan dhe Shtime.Të gjitha rastet e konfirmuara janë të pavaksinuar me vaksinën MMR (kundër fruthit, shytave dhe rubellës) si dhe kanë marrë trajtim spitalor, që dëshmon për potencialin serioz të komplikimeve të mundshme që mund të shkaktojë fruthi”, thuhet në njoftim.
Derisa, IKShPK u ka bërë thirrje prindërve që të kontrollojnë kartelën e vaksinimit të fëmijëve dhe t’i vaksinojnë fëmijët e tyre në qendrën më të afërt të Mjekësisë familjare.
“Duke marrë parasysh natyrën shumë ngjitëse të fruthit dhe rrezikun për përhapje të mëtejshme, IKShPK u bën thirrje urgjente prindërve që të kontrollojnë kartelën e vaksinimit të fëmijëve të tyre dhe t’i vaksinojnë fëmijët në qendrën më të afërt të Mjekësisë familjare në komunën përkatëse.Gjithashtu, rekomandohet që të shmangen kontaktet e panevojshme me persona të dyshimtë në fruth që shfaqin simptoma, si temperaturë e lartë, skuqje, ndryshime në lëkurë, kollë apo rrufë. Çdo person me shenja të dyshimta në fruth, duhet të paraqitet menjëherë në institucionet shëndetësore”, thuhët ndër të tjera./teve1.info/
