13 personat e lënduar si pasojë e shpërthimit të bombolës së gazit që ndodhi brenda një shtëpie në fshatin Kçiq të Mitrovicës, po trajtohen në Qendrën Klinike Universitare të Kosovës (QKUK).
Pacientët pasi kishin marrë trajtimin fillestar në Spitalin e Përgjithshëm të Mitrovicës, janë dërguar në QKUK, bëri të ditur për teve1.info zëdhënësja e këtij spitali, Nitë Mustafa.
Ndërkohë, Shërbimi Spitalor Klinik dhe Universitar (ShSKUK) ka bërë të ditur se pacientët kanë pësuar djegie të shkallës së dytë dhe të tretë, në gjymtyrë të ndryshme të trupit, përfshirë, fytyrë, duar, këmbë dhe pjesë të tjera të trupit.
Ndërkaq, katër pacientë si pasojë e plagëve të rënda janë futur në sallën e operacionit.
“Ekipi emergjent në përbërje të mjekëve specialistë të profileve të ndryshme dhe infermierëve po trajton që të trembëdhjetë pacientët”, thuhet në njoftim.
Lajmin e ka konfirmuar edhe zëdhënësi i Policisë së Kosovës për rajonin e Mitrovicës, Avni Zahiti.
“Rreth orës 16:30, policia ka pranuar informatë se si pasoj e një shpërthimi në një shtëpi në fshatin Kçiq të Mitrovicës, 13 persona kanë pësuar lëndime, të lënduarit janë dërguar për tretman mjekësor në Spitalin Rajonal të Mitrovicës”, ka thënë Zahiti.
Sipas zëdhënësit policor, bazuar në informatat e para dyshohet se shpërthimi ka ndodhur nga një bombolë gazi./teve1.info/
