Kryeministri i Kosovës, Albin Kurti, tha se dekadat paraprake të Universitetit të Prishtinës prej themelimit e deri tash ishin dekada të ngritjes teknike e akademike, derisa shtoi se uron që dekada e gjashtë e këtij institucioni të arsimit të lartë publik, të jetë e përplotësimit të mëtutjeshëm me praktika, mësimdhënie të avancuar, studentë të shembullt si dhe hulumtime shkencore e publikime ndërkombëtare, raporton teve1.info
Kurti këto deklarime i bëri gjatë pjesëmarrjes në ceremoninë e shënimit të 53 vjetorit të themelimit të Universitetit të Prishtinës “Hasan Prishtina”.
Kurti tha se historia e UP-së e ndanë historinë e Kosovës në dy pjesë në vitin 1970, në atë pa universitet dhe historinë e Kosovës me universitet.
“E para ka marrë fund qysh atëherë. E dyta shkon duke u rritur dhe shtrirë në kohë sa herë festohet me 15 shkurt”, tha ndër të tjera Kurti.
Ai tha se as demonstratat qytetare e as lufta çlirimtare nuk mund të paramendohen pa UP-në.
“E sot në shtetësinë e pavarësinë e Kosovës nuk ka institucion në rol dhe kontribut më të madh se UP-ja. Andaj teksa kremtojmë ditëlindjet e UP-së kremtojmë rritjen tonë si shtet”, tha Kurti.
