Kryeministri i Kosovës, Albin Kurti, e takoi Ambasadorin e Francës në Kosovë, Olivier Guérot, me të cilin biseduan për bashkëpunimin midis dy vendeve dhe integrimin e Kosovës në organizata ndërkombëtare, raporton teve1.info
Sipas një komunikate për medie të lëshuar nga Qeveria, në takim është diskutuar për siç thuhet, marrëdhëniet bilaterale shumë të mira ndërmjet dy vendeve dhe mënyrat për avancimin e mëtejmë të tyre.
“Marrëdhëniet bilaterale shumë të mira ndërmjet dy vendeve dhe mënyrat për avancimin e mëtejmë të tyre dhe propozimi evropian për normalizim të raporteve me Serbinë, i përkrahur edhe nga Franca, ishin temat qendrore të bisedës. Republika e Kosovës mbetet e përkushtuar dhe konstruktive në dialog teksa dëshiron marrëdhënie të mira fqinjësore dhe integrim në BE dhe NATO, u shpreh kryeministri Kurti”, thuhet në komunikatën e lëshuar nga Qeveria.
Sipas njoftimit, Kurti e falënderoi ambasadorin Guérot për rolin dhe mbështetjen e vazhdueshme të Francës ndaj Kosovës, si në zhvillimin e brendshëm ashtu edhe në fuqizimin e subjektivitetit ndërkombëtar përmes anëtarësimit në organizata ndërkombëtare.
