Deputeti i PDK-së, Ilmi Reçica, e ka kujtuar 25 vjetorin e masakrës së Likoshanit dhe Qirezit, të cilën e ka quajtur vrasje masive ndaj shqiptarëve nga aparati shtetëror kriminel serb, raporton teve1.info
Përmes një statusi në Facebook, Reçica ka thënë se 28 shkurti i vitit 1998 e shënon fillimin e luftës në Kosovë dhe përvjetorin e betejës s lavdishme të UÇK-së të zhvilluar në fshatrat Likoshan e Qirez të Drenicës.
Reçica ka thënë se në linjë me Rezolutën e Kuvendit të Republikës së Kosovës për Gjenocidin Serb të Kryer në Kosovë të 16 Majit të vitit 2019, si dhe angazhimin e Qendrës “Gjenocidi në Kosovë – Plagë e hapur”, për Lulëkuqen me Katër Petale si simbol unik të përkujtimit të viktimave të gjenocidit të Serbisë në Kosovë, së shpejti do të ndërmerren hapa konkret për zyrtarizimin e kësaj nisme në Kuvendin e Republikës së Kosovës.
“28 Shkurti i vitit 1998 shënon fillimin e luftës në Kosovë dhe përvjetorin e betejës së lavdishme të UÇK-së të zhvilluar në fshatrat e Drenicës, Likoshan e Qirez kundrejt forcave okupatore serbe. Pas humbjeve të pësuara forcat kriminale serbe në shenjë hakmarrje me helikopterë dhe mjete të rënda rrethuan dy fshatrat e Drenicës, ku vranë e masakruan 24 civilë të pafajshëm shqiptarë.
Masakra në Likoshan dhe Qirez shënon fillimin e vrasjeve masive të shqiptarëve deri në gjenocid nga aparati shtetëror kriminal serb, ngjarje këto që tronditën botën demokratike dhe ndërgjegjësuan popullin shqiptarë në masivizimin e UÇK-së në luftë të armatosur frontale kundër okupatorit serb.
Duke qenë se shqiptarët e Kosovës kanë qenë viktima të gjenocidit serb, në linjë me Rezolutën e Kuvendit të Republikës së Kosovës për Gjenocidin Serb të Kryer në Kosovë të 16 Majit të vitit 2019, si dhe angazhimin e Qendrës “Gjenocidi në Kosovë – Plagë e hapur”, për Lulëkuqen me Katër Petale si simbol unik të përkujtimit të viktimave të gjenocidit të Serbisë në Kosovë, së shpejti do të ndërmarrim hapa konkret për zyrtarizimin e kësaj nisme në Kuvendin e Republikës së Kosovës.
Lavdi e përjetshme dëshmorëve dhe martirëve të kombit, të cilët dhanë jetën për lirinë e vendit!”, ka shkruar Reçica.
