Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj, e sheh si shqetësues rënien e numrit të nxënësve dhe ikjen e mësimdhënësve nga vendi.
Për këtë të fundit, Jasharaj thotë se aktualisht nuk është problem por që me kalimin e viteve mund të sjellë pasoja të mëdha për arsimin në Kosovë.
Shqetësuese e sheh edhe njohësi i arsimit, Rinor Qehaja.
Jasharaj e Qehaja kërkojnë nga Qeveria që të reflektojnë në këtë drejtim.
Sipas Jasharajt, shqetësues është edhe rënia e numrit të nxënësve nëpër shkolla.
Ai thotë se është rrezik që të mbyllet ndonjë shkollë si mungesë e nxënësve.
“Nataliteti është se do të na krijojë probleme në të ardhmen, është një rrezik për krejt Kosovën dhe do të na qesë në hall në të ardhmen e afërt me mbyllje të paraleleve, me mbyllje të ndonjë shkolle, pastaj shteti dhe ne duhet të kemi kujdes se këta njerëz nuk mund t’i hedhim në rrugë, nga ana tjetër po them duke parë një zhgënjim të mësimdhënësve me Ligjin e Pagave duke parë një presion të vazhdueshëm që iu bëhet, një fyerje publike që iu bëhet madje kemi deklarata të individëve që Qeveria nuk distancohet se po prodhojmë analfabetë se këta nuk janë punëtorë të mirë, mësimdhënësi në të ardhmen e afërt duke parë pagën e tij që nuk është në nivel, duke parë gjithë këtë presion dhe kërkesat që iu bëhen pa iu ofruar kushte pune, ata mund të vendosin ose ta ndërrojnë profesionin brenda Kosovës, ose më e keqe se kjo t’i marrin familjet si shumë të tjerë dhe të shkojnë jashtë, për të bërë punë çfarëdo po për një jetë më të mirë”, thotë Jasharaj.
Mirëpo, këtë trend të uljes së nxënësve në sistemin parauniversitar në Kosovë, nuk e sheh si befasues Rinor Qehaja, drejtor në Institutin “EdGuard”.
Qehaja ka kritika për mungesë të reagimit institucional për rënien e numrit të nxënësve.
“Numri në rënie i nxënësve nuk është befasuese, pra ka projeksione statistikore nga Agjencia e Statistikave për vite më radhë që na thërrasin për këtë. Ajo çka është befasuese është mungesa e një reagimi institucional për të ofruar një zgjidhje të qëndrueshme dhe strategjike për këtë problematik. Ajo zgjidhje vije kur pikë së pari kemi një analizë të dhënave, pra një evidencë se kush është numri i saktë i nxënësve në shkollat tona, kush është numri i saktë karshi numrit të mësimdhënësve , karshi hapësirave shkollore dhe vetëm atëherë mund të krahasojmë me projeksione statistikore demografike për me ardh tek një dokument, nacional që do të na jepte një rrugëtim mbi strukturimin e shkollave në nivel vendi”, tha Qehaja./EO/