Policia Rajonale e Ferizajt ka intensifikuar gjatë muajit qershor kontrollet në trafik, me fokus të veçantë ndaj drejtuesve të motoçikletave dhe skuterëve.
Si rezultat i këtyre kontrolleve, janë shqiptuar gjithsej 106 gjoba ndaj drejtuesve të motoçikletave për shkelje të rregullave të komunikacionit rrugor.
Po ashtu, janë konfiskuar 74 motoçikleta dhe skuterë, kryesisht për mungesë të dokumentacionit të rregullt.
Ky aktivitet është realizuar në kuadër të planit operativ “Kontrolli i shtuar i qarkullimit të motoçikletave dhe skuterëve”.
Sipas policisë, llojet e kundërvajtjeve të evidentuara janë:52 gjoba për drejtim të motoçikletës pa patentë shoferi, 46 gjoba për drejtim pa regjistrim, 3 gjoba për mosvendosje të helmetës mbrojtëse dhe 5 masa të tjera.
Policia ka apeluar te qytetarët që të respektojnë rregullat e trafikut, duke theksuar se ngasja e papërgjegjshme e motoçikletave rrezikon jetën e drejtuesve dhe pjesëmarrësve të tjerë në komunikacion.
Gjithashtu, është bërë e ditur se kontrollet do të vazhdojnë edhe në ditët në vijim, me qëllim rritjen e sigurisë rrugore dhe parandalimin e aksidenteve.
“Ftohen qytetarët të bashkëpunojnë me policinë dhe të raportojnë çdo shkelje përmes aplikacionit “Lajmëro Policinë” ose në numrat:
192, 0290/326-250 dhe 0290/322-406. Të dhënat e raportuesve ruhen në konfidencialitet të plotë”, theksohet në njoftim./teve1.info/
