Janë veturat që të hënën ia mësyn Prishtinës.
E plot 140 mijë të tilla, kalojnë çdo ditë nëpër qendrën e kryeqytetit.
Por, numri i tyre mund të bie ndjeshëm pas 24 qershorit.
Krejt kjo pasi Komuna e Prishtinës, po e shqyrton vendosjen e një tarife prej 10 eurosh, për veturat nga komunat e tjera.
“Nuk është për krejt Prishtinën është vetëm për unazën e brendshme të zonës qendër. Mundësia për përcaktimin e automjeteve është mundësi teknologjike, teknologjia ekziston kamerat i kemi në krejt nyejt kryesore të kryeqytetit kamerat lexojnë targat, targat regjistrohen në databazë”, ka thënë Braha.
Brahaj tregon se kush mund të lirohet nga pagesat.
“Do të këtë përjashtime nga pagesa, psh përjashtohen hyrjet ne QKUK, do të këtë lehtësime për punojësit e institucioneve publike”, ka thënë tutje Braha.
E kjo nuk do jetë taksa e vetme që mund do të vendoset në Prishtinë, pas 24 qershorit.
Sipas Draft – Rregullorës, 1 euro duhet të paguajnë qytetarët e komunave të tjera dhe turistët, nëse duan që natën ta kalojnë në Prishtinë.
E gjithë situatën nga afër, thotë se po e përcjell edhe zyra e Avokatit të Popullit.
“Ne jemi tu e përcjell situatën dhe do te bëjmë një vlerësim profesional në mbështetje që e ka avokati i popullit, natyrisht që komuna e Prishtinës gëzon benefite në kuptim të rregullave që i cakton për administratën dhe për qytetin në bazën e ligjit, mirëpo për ne është shumë me rendësi që çdo vendim i komunës të jetë proporcional të jetë i bazuar në ligj dhe të ketë një ligj legjitim nëse këto 3 komponente plotësohen atëherë edhe vendimet që janë jo shumë të favorshëm për qytetarët kanë një bazë ligjore dhe mbështeten në standarde në të kundërt ne do të dalim me qëndrim zyrtar nëse ky vendim i ka shkel të drejtat e qytetarëve”, u shpreh Qelaj.
E opozita në Komunën e Prishtinës, thonë se ka metoda të tjera për ta përmirësuar gjendjen në komunikacion.
“Ne jemi kundër kësaj takse, edhe është absurde kjo taksë kaq e lartë për qytetarët, në vend se me ja u lehtësuar jetën qytetareve ky po ju qet taksa te reja dhe me atë mendësinë që po e zvogëloj komunikacionin, komunikacioni nuk zvogëlohet tu i dënuar qytetarët por zvogëlohet me parkingje edhe me metoda të reja e jo në këtë formë”, theksoj Redenica.
Ky draft që ndodhet në fazën e konsultimit publik, parasheh vendosjen e taksave edhe për 41 veprimtari biznesore.
Plot 1 mijë euro në vit, do të duhet të paguajnë sallonet e floktarisë, ndërsa njëjtë edhe shërbimet profesionale si avokatët, noterët e përmbaruesit privat.
