Një zyrtare policore sot është plagosur aksidentalisht nga kolegu i saj në vendin e punës.
Tashmë gjendja e saj është stabile dhe e njëjta është dërguar në Ortopedi, për shkak se copa e gëzhojës së plumbit e ka prekur në këmbë.
Kështu ka bërë të ditur për Tëvë1, mjeku kujdestar Naser Syla.
“Po, është pranuar dhe trajtuar tek ne në QE, pas ekzaminimeve të nevojshme dhe trajtimit është transferuar në Klinikën e Ortopedisë për vazhdim të trajtimit”, tha Syla.
Ndërkaq, Inspektorati Policor i Kosovës (IPK) ka bërë të ditur se bëhet fjalë për një incident-shkrepje aksidentale të armës së zjarrit në objektin e Stacionit Policor Jugu në Prishtinë.
Gjithashtu, zyrtari policor që shkaktoi aksidentin është suspenduar.
“Sipas hetimeve paraprake, dyshohet se si pasojë e shkrepjes aksidentale një copë e gëzhojës së plumbi ka plagosur një zyrtare policore në këmbë dhe e njëjta është transportuar menjëherë për trajtim mjekësor. Lidhur me rastin, është njoftuar edhe prokurori i shtetit, i cili do të udhëheqë hetimet e mëtejshme në bashkëpunim me Inspektoratin Policor të Kosovës (IPK). Arma e zjarrit është konfiskuar, ndërsa zyrtari policor që shkaktoi aksidentalisht shkrepjen është suspenduar. Hetuesit e IPK-së pritet të ndërmarrin edhe veprime të tjera hetimore drejt ndriçimit të të gjitha rrethanave të këtij rasti”, thuhet në njoftim./teve1.info/
Një zyrtare e policisë dyshohet se është plagosur aksidentalisht nga kolegu i saj
