Detyrën e kanë të njëjtë, andaj planin e bëjnë bashkë.
Këto janë tri zyrtaret e reja të Policisë së Kosovës të cilat i takojnë gjeneratës 61-të, e që nga e hëna kanë filluar punën në drejtorinë Rajonale të stacionit policor në Mitrovicë e veriut.
Për herë të parë për Tëvë1, zyrtarja policore e komuniteti serb, Marija Gjorgjeviq thotë se është privilegj t’i shërbesh uniformës së Policisë së Kosovës.
“Do të doja që ky vit të ishte premtues për popullin tonë, dhe që komunikimi dhe lidhja të jetë sa më e mirë ndërmjet Policisë së Kosovës dhe qytetarëve nga Mitrovica e Veriut. Shpresoj të jenë të kënaqur me ne, dhe të mundohemi t’u ndihmojmë të gjithëve, dhe të kemi komunikim sa më të mirë. Shpresoj edhe ju të jeni të kënaqur me ne. Ne do t’ju shërbejmë juve si duhet. Mendoj që ky vit do të jetë premtues për të gjithë. Për krejt popullin e Kosovës, Policinë e Kosovës dhe veriut të Mitrovicës”, shprehet ajo.
Përveç komunitetit serb, pjesë e Policisë u bë edhe Ajnisha Shehu nga komuniteti ashkali.
“Për mua është një krenari e madhe me i sherbyer Policisë së Kosovës, sidomos në Mitrovicë të veriut. Do të ndikoi shumë pozitivisht për arsyeje që kemi me punu pa dallim kombësie, gjinie apo race” , thotë Shehu.
E patrullimet kanë nisur edhe në terren, si këtu afër stacionit të Autobusëve në veri të vendit.
Sead Berisha, zyrtar policor thotë se do t’a kryejnë detyrën me përgjegjësi të lartë.
“Së bashku me kolegët kemi diplomuar në gjeneratën e fundit. Dhe është nder dhe krenari që t’i shërbejmë qytetarëve të Republikës së Kosovës pa dallim përkatësie etnike, gjinore, religjioni apo ngjyre, sidomos edhe në këtë pjesën veriore të Republikës së Kosovës ku kemi një bashkëpunim shumë të mirë me komuniteti serbë, jemi profesional në të gjitha anët”, thotë Berisha.
Sipas zëvendësdrejtorit të Policisë për rajoni e veriut, Veton Elshani, totali i zyrtarëve policorë nga komunitetit serb është mbi 140.
Sipas tij, kjo do të ndihmojë më shumë në planet operative dhe bashkëpunimin në terren me qytetarët.
“Kjo na ndihmon shumë, pikërisht për arsyeje shembull së pari te gjuhët, pastaj kemi policë të cilët janë nga rajoni i veriut, të cilët jetojnë dhe punojnë këtu. Ka dhe të tjerë por që gjuhën serbe e flasin shumë mirë, konsiderojmë që tash e kemi krijuar një bazë të mirë të komunikimit me qytetarët dhe se këta janë vetëm një vlerë e shtuar e asaj që ne e kemi bërë deri tani” , shprehet Elshani.
Kështu së bashku, zyrtarët policorë fillojnë patrullimet edhe në zonat tjera veriore.
