Shefja e lartë për zhvillim ndërkombëtar e Shteteve të Bashkuara, Samantha Power, do të vijë në Kosovë dhe Serbi këtë javë për t’u takuar me udhëheqësit e të dyja vendeve.
Power do të takohet me kryeministrat dhe presidentët e të dyja vendeve, duke i inkurajuar të dyja vendet të qëndrojnë në rrugën e normalizimit të marrëdhënieve mes tyre dhe të vazhdojnë të ecin drejt anëtarësimit në Bashkimin Evropian, shkruan AP.
Ajo “do të nënvizojë mbështetjen e USAID-it për rrugën e Serbisë drejt anëtarësimit në Bashkimin Evropian përmes partneritetit tonë për të nxitur rritjen ekonomike dhe zhvillimin demokratik”, tha USAID në një deklaratë, transmeton teve1.info.
Power bëhet drejtuesja e parë e Agjencisë Amerikane për Zhvillim Ndërkombëtar që udhëton në Serbi, e cila mban lidhje të ngushta historike dhe kulturore me Rusinë.
Power do të jetë zyrtarja e parë e lartë e qeverisë amerikane që do të udhëtojë në rajon qëkur Bashkimi Evropian ndërmjetësoi një takim midis krerëve të dy qeverive javën e kaluar në Bruksel, duke i inkurajuar ata që të kthehen në dialog paqësor.
