Bojan Jevtić, zyrtari policor i arrestuar sot në pikën kufitare “Dheu i Bardhë”, po intervistohet brenda ambienteve të Inspektoratit Policor të Kosovës (IPK). Kështu kanë bërë të ditur burime të Tëvë1 nga terreni.
Jevtić, i cili mbante njëkohësisht pozitën e zëvendëskomandantit dhe shefit të operativës në një nga strukturat policore në pjesën veriore të Kosovës, dyshohet për përfshirje në veprimtari të spiunazhit. Ai ka qenë nën hetim dhe mbikëqyrje të vazhdueshme nga autoritetet kompetente për një periudhë të gjatë.
Sipas njoftimeve në media, Jevtić dyshohet për bashkëpunim me strukturat e sigurisë së Serbisë dhe për rrjedhje të informatave të ndjeshme me karakter të sigurisë kombëtare.
Arrestimi i tij është rezultat i një operacioni të përbashkët ndërinstitucional, të zhvilluar nga Prokuroria Speciale e Kosovës në bashkëpunim me Agjencinë e Kosovës për Inteligjencë (AKI) dhe Inspektoratin Policor të Kosovës.
Autoritetet ende nuk kanë dhënë detaje shtesë rreth zhvillimeve të mëtejshme në këtë rast.
