Zyrtari i dytë më i lartë i Komisionit Evropian ka thënë se lufta e Izraelit në Gaza duket “shumë e ngjashme me gjenocidin”, duke shënuar herën e parë që një ekzekutiv i këtij organi e ka përdorur këtë term.
“Nëse nuk është gjenocid, duket shumë si përkufizimi i përdorur për të shprehur kuptimin e tij”, tha zëvendëspresidentja e Komisionit Evropian, Teresa Ribera, për revistën Politico. “Ajo që po shohim është një popullsi konkrete që po shënjestrohet, vritet dhe dënohet të vdesë nga uria”.
Ndërsa Komisioni Evropian e ka akuzuar më parë Izraelin për shkelje të të drejtave të njeriut në Gaza, deri më tani nuk i ka cilësuar veprimet e tij si gjenocid.
Javën e kaluar, komisioni propozoi kufizimin e aksesit të Izraelit në programin e tij kryesor të financimit të kërkimit pas thirrjeve nga vendet e BE-së për të rritur presionin mbi Izraelin për të lehtësuar krizën humanitare në enklavë./teve1/
