Skuadra LA Lakers e udhëhequr nga ylli LeBron James, në një moment ishte në epërsi prej 23 pikësh ndaj New Orleans Pelicans, por në fund humbi dhe kështu zvogëloi edhe më shumë gjasat për pjesëmarrje në plejofin e ligës NBA.
Lakersi humbi të hënën në mëngjes (sipas kohës në Kosovë) me rezultatin 116:108. Skuadrës nuk i ndihmoi as performanca e shkëlqyer e Jamesit, që ndeshjen e mbylli me 39 pikë, 9 kërcime e 5 asistime. Kjo është humbja e shtatë e LA Lakers në 10 ndeshjet e fundit.
Dhe kur deri në fund të sezonit të rregullt kanë mbetur edhe pak ndeshje për t’u zhvilluar, për ndonjë skuadër 9 e për ndonjë 10, LA Lakers zë vendin e dhjetë Konferencën Perëndimore me 31 fitore e 43 humbje. Lideri i kësaj konference, Phoenixi ka 61 fitore e 14 humbje.
Te New Orleans, që zë vendin e nëntë në Konferencën Perëndimore me 32 fitore e 43 humbje, më efikasi ishte Brandon Ingram me 26 pikë, 7 kërcime e 5 asistime.
