Përkundër spekulimeve të shumta, e ardhmja e trajnerit Murat Yakin është definuar të premten, kanë njoftuar mediumet zvicerane.
Tashmë vendimi është marrë dhe Yakin së bashku me asistentin e tij, Giorgio Contini do ta vazhdojnë punën te Kombëtarja e Zvicrës.
Qëndrimin e Yakinit në krye të ekipit e ka konfirmuar edhe Federata e Futbollit të Zvicrës. Federata ka njoftuar se Yakin dhe asistenti Contini tashmë kanë vazhduar kontratat, të cilat do t’u skadonin më të përfunduar Kampionati Evropian.
“Dyshja do ta vazhdoj punën te kombëtarja pas Evropianit të suksesshëm, ku arritën deri në çerekfinale”, thuhet në njoftimin e federatës zvicerane.
Detajet tjera do të zbulohen të hënën kur do të mbahet konferencë për shtyp, në të cilën Yakin do ta rinovojë kontratën me federatën.
Zvicra pati paraqitje të mirë në “Euro 2024” por u eliminua në çerekfinale nga Anglia pas penalltive.
Yakin është në krye të Zvicrës prej verës së vitit 2021 kur e zëvendësoi Vladimir Petkoviqin.
