Punimet po vazhdojnë të zvarriten.
Në korridorin e shkollës fillore “ Gjergj Fishta” në kryeqytet vazhdojnë të qëndrojnë mjetet e punës, mbeturina e pluhur që nga fillimi i shtatorit.
Ndonëse afati për përfundimin e rinovimeve ishte më 21 shtator ato nuk përfunduan.
Megjithatë komuna e Prishtinës ua shkëputi kontratën, me arsyetimin se operatori ekonomik ka punuar me material jo të duhur në shtrimin e dyshemesë.
“S’ka tolerime për mospunë! I kemi shkëputur kontratën edhe një operatori ekonomik i cili është treguar i papërgjegjshëm. Ky operator nuk u është përmbajtur kushteve të kontratës. Bëhet fjalë për renovimin e Sh.F.M.U “Gjergj Fishta”, në të cilën operatori ekonomik ka punuar me material jo të duhur në shtrimin e dyshemesë”, thonë nga Komuna e Prishtinës.
E zvarritjen e punimeve si dhe shkëputjen e kontratës në këtë kohë nuk po e mirëpresin drejtoria e kësaj shkolle.
Supije Zhitia, drejtoreshë në këtë shkollë thotë se si proces nuk do të jetë i thjeshtë, mirëpo po shpreson që punët të përfundojnë sa më shpejtë meqë janë me orar të shkurtuar që nga fillimi i vitit.
“Sigurisht nuk do te jetë e thjeshtë, jo e këndshme por kjo kompetencë ka qenë e komunës meqë është punëdhënës të këtyre investimeve kapitale që janë bërë në shkollë, renovimit shtrimit të dyshemeve dhe mureve të nyjeve sanitare që ka pasë kompania e caktuar apo operatori ekonomik, ata kanë vlersu që nuk kanë qenë sipas parashikimeve ne mund të themi që kemi pas afatin e caktuar prej kompanisë deri më 21 shtator dhe si afat i kryerjes së një pjese të punës nuk janë përmbajtë. Dmth edhe ashtu jemi me orar të shkurtuar po du me besu shumë që me vet faktin që kanë marrë si vendim me ndërpre kontratën sigurisht kanë ndonjë operator të përgjegjshëm apo të gatshëm me kontraktu dhe të kryhen sa më parë punët”, deklaroi Zhitia.
Për të vazhduar rinovimi i shkollës “ Gjergj Fishta” pritet të rihapet tenderi përsëri.
