Kështu është diskutuar në takimin mes zëvendësministrave të Punëve të Jashtme dhe Diasporës, Kreshnik Ahmeti dhe Liza Gashi me delegacionin amerikan të drejtuar nga Martin McDowell.
“Në takim u diskutua për raportet bilaterale mes Republikës së Kosovës dhe Shteteve të Bashkuara të Amerikës dhe situatën e sigurisë në rajon, nën hijen e agresionit ushtarak të Federatës Ruse mbi Ukrainën. Zëvendësministrat theksuan rëndësinë e thellimit të bashkëpunimit mes të dyja vendeve, ndër të tjera edhe në dimensionin e sigurisë. Hapja e një baze të përhershme ushtarake amerikane në Kosovë, anëtarësimi i plotë në Kartën e Adriatikut dhe përafrimi sa më i shpejtë më NATO-në, janë hapa të domosdoshëm jo vetëm për sigurinë e Republikës së Kosovës, por edhe të rajonit dhe Evropës”, thuhet ndër tjerash në njoftim.
Ndërkaq, McDowell ka falënderuar Kosovën për strehimin e afganëve dhe ka shprehur vlerësimin për rreshtimin e menjëhershëm të Kosovës me vendet demokratike, kundër agresionit ushtarak dhe invazionit rus në Ukrainë.
“Të dyja palët shprehën vullnet për intensifikim të mëtutjeshëm të kontakteve, në shërbim të mirëmbajtjes dhe përparimit të raporteve të shkelqyeshme në mes të Republikës së Kosovës dhe Shteteve të Bashkuara të Amerikës”, njofton tutje MPJD./teve1.info/.
