Kryenegociatori i Kosovës me Bashkimin Evropian, Jeton Zulfaj i ka reaguar ministri serb për integrim evropian, i cili ka pretenduar se serbët në Kosovë janë të privuar nga të drejtat e tyre.
Ai duke përmendur të drejtat që u garantohen edhe me Kushtetutë komunitetit serb, ka thënë se pretendimet e ministri serb janë propagandë.
Zulfaj në një postim në X ka thënë se komuniteti që privohet nga të drejtat janë shqiptarët në Luginën e Preshevës.
“Sa i përket privimit nga të drejtat: në Serbi, adresat e shqiptarëve bëhen pasive dhe, bashkë me to, humbasin dokumentet e tyre, kujdesin shëndetësor, arsimin dhe të drejtën e votës. Vetë Komiteti i Helsinkit në Serbi e quan këtë “spastrimi etnik përmes mjeteve administrative”. Raporti i Komisionit Evropian për Serbinë i vitit 2025 dokumenton të njëjtën praktikë. Kjo është privim nga të drejtat. Por kjo nuk ndodh sepse Nemanja dhe Nemanajat në Serbi nuk e dinë. Ndodh sepse nuk u intereson. Manuali rus nuk kërkon të vërtetën apo faktet. Por kjo është detyra jonë si evropianë: të çmontojmë propagandën ruse dhe zëdhënësit e saj kudo që i gjejmë”, ka shkruar Zulfaj në X.
