Zyra e Rregullatorit të Energjisë ka bërë të ditur se nuk do të ketë shtyrje ta afatit për tregun e lirë energjetik.
Nga kjo zyre në një përgjigje për teve1.info kanë thënë se ndërmarrjet që kanë plotësuar kriteret për tregun e hapur janë të obliguara të lidhin kontrata me furnizues të licencuar në treg të lirë.
“Sipas Ligjit Nr. 05/L-085 për Energjinë Elektrike, të gjitha ndërmarrjet ekonomike që i kanë përmbushur kriteret ligjore për të dalë në tregun e hapur, janë të obliguara të furnizohen me energji nga një furnizues i licencuar në treg të lirë. Ndërmarrjet ekonomike që nuk kanë lidhur kontratë me një furnizues në tregun e hapur, janë furnizuar përkohësisht nga Furnizuesi i Mundësisë së Fundit (FMF) për një periudhë maksimale prej 60 ditësh, ashtu siç e parasheh ligji”, thuhet nga ZRrE.
Poashtu është bërë e ditur se pas përfundimit të afatit për furnzim me energji për bizneset që nuk kanë lidhur kontratë për treg të lirë, nuk do të ketë furnizim me energji.
“Pas përfundimit të periudhës 60-ditore, nëse ndërmarrja nuk ka siguruar kontratë me një furnizues të licencuar në treg të hapur, Operatori i Rrjetit të Shpërndarjes është i obliguar të ndërpresë furnizimin me energji elektrike, pasi nuk ekziston më asnjë bazë ligjore për vazhdimin e furnizimit”, thuhet nga ZRrE.
Afati për furnizim me energji për bizneset kalon më 31 korrik.
Bizneset anëtare të Dhomës së Tregtisë dhe Industrisë së Kosovës paralajmërojnë veprime të ashpra nëse ZRRE nuk tërhiqet nga vendimi për liberalizimin e tregut të energjisë.
Në një komunikatë për media nga Dhoma e Tregtisë është thënë se nëse ZRrE nuk merr sot vendim për shtyrje të afatit do të ndërmarrin masa dramatike dhe ligjore.
