16 gushti është caktuar si datë kur Zyra e Rregullatorit të Energjisë do të shkëpusë nga rrjeti energjetik ato biznese që nuk kanë lidhur kontratë me furnizuesit e licensuar.
Deri në këtë datë, janë edhe tre ditë që bizneset që kanë më shumë se 50 punëtorë ose mbi 10 milionë euro qarkullim, të dalin në treg të lirë energjetik.
“ZRrE u bën thirrje të gjithë konsumatorëve komercialë që duhet të jenë në treg të lirë dhe që ende nuk kanë lidhur kontratë komerciale të furnizimit me energji elektrike, të veprojnë pa vonesë dhe të zgjedhin një nga furnizuesit e licencuar të publikuar në faqen zyrtare të ZRrE, sepse nga data e 16.08.2025 konsumatorët komercial të cilët nuk kanë nënshkruar kontratë komerciale me një nga furnizuesit e licencuar do të ndërpriten nga rrjeti energjetik”, thuhet nga ZRrE.
Ky njoftim erdhi pas vendimit që ky institucion kishte marrë nga shkalla e dytë e Gjykatës Komerciale e cila kishte refuzuar shtyerjen e liberalizimit të tregut të energjisë elektrike.
Dhoma e Tregtisë dhe Industrisë së Kosovës, e cilëson 16 gushtin si afat tejet të shkurtër.
“DhTIK vlerëson se afati i dhënë nga ana ZRrE deri më 16 gusht për bizneset që të lidhin kontrata për furnizim, është shumë i shkurtë dhe shkakton probleme të mëdha për qindra biznese, të cilat nuk kanë nënshkruar me asnjë kompani të licencuar. Vlerësojmë se forma e zgjedhur nga ZRRE për ta realizuar Liberalizimin e Tregut të Energjisë Elektrikë është tërësisht e gabuar dhe e dëmshme për qytetarët dhe ekonominë e vendit”, thuhet nga DhTIK.
Si e papranueshme dhe palogjikshme, ky afat kohor i ZRRE-së, po vlerësohet edhe nga Shoqata e Prodhuesve të Kosovës.
Kryetari i kësaj shoqate, thotë se ka biznese që përkundër se mund të përballen me shkëputje të rrymës, nuk do të nënshkruajnë kontratë.
“Ka biznese që do t’i rezistojnë, në bazë të informative që i kemi. Nuk do të nënshkruajnë dhe thonë le të ndërprehet energjia elektrike, jemi në proces të Gjykatës dhe presim deri të dalë vendimi i Gjykatës. Kjo në një farë forme e thellon edhe më shumë krizën dhe urojmë që edhe Gjykata t’i trajtojë sa më shpejtë. T’u e pasë parasysh edhe numrin e lënëdëve, është vështirë edhe për Gjykatën por urojmë që t’i trajtojë sa më shpejt, sepse dëmi financiar është jashtëzakonisht shumë i madh, dita ditës që vonohet ky si proces”, ka thënë Kushtrim Ajvazi – kryetar i shoqatës.
Në kuadër të tregut të lirë energjetikë, ZRRE ka licensuar 22 kompani për tregtim të energjisë.
