Zyra e Rregullatorit për Energji, njofton të gjitha palët e interesuara se ka vendosur në konsultim publik draftin e Bilancit Vjetor të Energjisë Elektrike për vitin 2023, raporton teve1.info
Sipas një njoftimi në Facebook, ky Bilanc është hartuar nga Operatori i Sistemit të Transmetimit dhe Tregut KOSTT sh. a. në pajtim me Ligjin për Energjinë si dhe dokumentin Rregulla dhe metodologjia për përgatitjen e bilanceve tё energjisë elektrike.
“Kërkesa gjithsej pёr energji elektrike në Kosovë për vitin 2023 duke përfshirë edhe konsumin për furnizim të veriut të Kosovës, parashihet të jetë 7,513.8 GWh.
Në këtë kërkesë është planifikuar të merr pjesë:
Kërkesa neto në Rrjetin e Shpërndarjes (amvisëria, ndriçimi publik, bizneset e vogla etj. të kyçura në nivelin e tensionit 35kV, 10kV dhe 0.4kV) është paraparë të jetë = 5,332 GWh
Humbjet në shpërndarje në vlerën =1,079.8 GWh,
Mihjet = 109.1 GWh
Trepça = 21.2 GWh
Sharr Cem = 66.5 GWh
NEW.CO. FERRONIKELI = 255.2 GWh
Shpenzimet e gjenerimit nga transmetimi 130.4 GWh (TC A =105 GWh, TC B= 25 GWh),
Humbjet e sistemit (Konsumi i Veriut të Kosovës)=379.1 GWh
Humbjet në transmetim në sasi prej= 139.4 GWh.
Humbjet totale të energjisë elektrike ndahen në:
Humbjet në rrjetin e transmetimit, që paraqesin diferencën e vlerave të matura, të energjisë elektrike në hyrje të transmetimit dhe atyre të matura në dalje të rrjetit transmetues.
Këtu përfshihen edhe humbjet për shkak te tranzitit (pikat matëse në linjat interkonektive 400, 220 dhe 110kV transferohen në kufijtë ndarës duke përdorur koeficientet e aprovuar të transferimit).
Humbjet në rrjetin e shpërndarjes (distribucionit), që janë diferenca e vlerave të matura të energjisë elektrike të pranuar në pikat e ndarjes nga rrjeti i transmetimit dhe hyrjet nga gjeneratorët e kyçur në shpërndarje dhe në anën tjetër vlerave të matura të energjisë elektrike të dërguar konsumatorëve.
Në planifikimin e humbjeve të tëra në rrjetin e transmetimit përfshihen humbjet e shkaktuara nga ngarkesa e konsumit të Kosovës dhe humbjet e shkaktuara nga energjia elektrike që kalon si tranzit.
Konsumi i veriut të Kosovës, është energjia që shpenzohet në katër komunat veriore të Kosovës. Kjo energji pritet të furnizohet nga KOSTT me buxhet jashtë tarifor”, thuhet ndë të tjera në raportin e hartuar nga ZRrE-ja.
