Prokuroria e Specializuar në Hagë ka kërkuar që ish-presidentit të Kosovës, Hashim Thaçi, të mos i llogaritet koha e kaluar në paraburgim në rastin për pengim të drejtësisë.
Kërkesa e ZPS-së është paraqitur në dosjen finale të çështjes “12”, ku përveç Thaçit akuzohen edhe Bashkim Smakaj, Isni Kilaj, Fadil Fazliu dhe Hajredin Kuçi.
Sipas Prokurorisë, koha e kaluar nga Thaçi në paraburgim duhet të llogaritet vetëm në çështjen “06”, ku ndaj tij është shqiptuar dënim prej 25 vjetësh burgim.
“Sipas Rregullës 163(6), të gjithë të akuzuarit kanë të drejtë që t’u llogaritet koha e kaluar në paraburgim para dënimit. Megjithatë, THAÇI aktualisht mbahet në paraburgim në bazë të dy fletarrestimeve të veçanta që janë në fuqi: (i) që nga nëntori 2020 në Çështjen 6; 1463 dhe (ii) që nga nëntori 2024 në procedurën aktuale”, thuhet në kërkesën e Prokurorisë.
ZPS-ja ka argumentuar se koha e kaluar në paraburgim mund të merret parasysh vetëm një herë, duke iu referuar edhe një vendimi të Dhomës së Apelit në çështjen Bemba et al.
“Dhoma e Apelit në çështjen Bemba et al. konfirmoi se, ‘në rrethanat kur një i akuzuar ka kaluar kohë në paraburgim si rezultat i fletarrestimeve të lëshuara në çështje të ndryshme, koha e kaluar në paraburgim mund të merret parasysh vetëm një herë.’”
“Prandaj, duke qenë se gjatë tërë këtyre procedurave THAÇI ka qenë gjithashtu i paraburgosur në lidhje me akuzat në Çështjen 6, çdo kreditim për kohën e kaluar në paraburgim duhet të zbritet vetëm nga dënimi i tij në atë çështje”, thotë ZPS-ja.
Për çështjen “12”, Prokuroria e Specializuar ka kërkuar gjashtë vjet burgim për Hashim Thaçin. Ndërkaq, për Bashkim Smakajn, Isni Kilajn dhe Fadil Fazliun janë kërkuar nga tre vjet burgim, ndërsa për Hajredin Kuçin nëntë muaj.
Nëse kërkesa e ZPS-së për Thaçin merret parasysh dhe dënimi në çështjen “12” i bashkëngjitet atij në çështjen “06”, atëherë shuma e dënimeve të kërkuara nga Prokuroria do të arrinte në 31 vjet burgim.
