Prokurori i Zyrës së Prokurorit të Specializuar, Joshua Hafetz në deklaratat hyrëse në gjykimin në rastin Thaçi 2, shfaqi një letër të copëtuar, e gjetur në shtëpinë e Isni Kilajt, më 2 nëntor 2023, e cila lidhej me kërkesën e Thaçit ndaj Kilajt për të ndryshuar deklaratën dëshmitari katër.
Prokurori Joshua Hafetz tha se pjesa gjashtë, faqja shtatë ishte kërkesa për dëshmitarin e katërt që të ndryshojë dëshminë.
“Pjesa gjashtë, faqja shtatë deri te rreshti konkret specifik. Besoj se mund të dëgjoni qartë zhurmën e letrës që sapo e dëgjuam dhe thuhet se dëshmitari i katërt duhet të ndryshojë dëshminë dhe në pjesën përfundimtare Thaçi e tha shumë qartë se çfarë mesazhi kishte me të”, tha Hafetz.
Hafetz tha se në kontrollin e autorizuat në banesën e Kilajt në Kosovë, Prokuroria sekuestroi copa letre të grisura nga një qese mbeturinash në hyrje të banesës.
Ekspertët e forenzikës kishin bashkuar copëzat, ku shihet se është e njëjta pjesë që Thaçi tha që dëshmitari duhet ta ndryshonte.
“Nëse do t’i referohemi datës 2 nëntor 2023, më pak se një muaj të Kryeziut dhe Kilajt për Thaçin, ZPS-ja zhvilloi një kontroll të autorizuar me urdhër gjyqësor në banesën e Kilajt në Kosovë. Gjatë këtij kontrolli, ZPS-jasekuestroi copa letra të grisura nga një qese mbeturinash që ishte lënë në hyrje të banesës së Kilajt. Ekspertët forenzikë i kanë bashkuar ato copat e grisura të letrës dhe rezultatet tregojnë që Kilaj kishte grisur dhe hedhur në kosh mbeturinash jo copa letrash rastësore, por letra të grisura të dy deklaratave të mëparshme konfidenciale të dëshmitarit katër. Një prej letrave të grisura ka numrin P3 të provave materiale të ZPS-së, pikërisht pjesa gjashtë, faqja shtatë e dëshmitarit të dëshmisë paraprake. Pjesa e dokumentit të Kilajt është e njëjta pjesë që Thaçi tha që dëshmitari duhet të ndryshonte”, tha Hafetz.
