Deputeti i Lidhjes Demokratike të Kosovës, Alban Zogaj ka thënë se janë të hapur për kthimin e Vjosa Osmanit në këtë parti.
Ai ka thënë se platforma e LDK-së është përbashkimi i të djathtëve dhe se kjo vlen edhe për Osmanin.
“Të gjithë ata që dëshirojnë me ju bashku platformës tonë politike, familjes tonë politike, jemi të hapur. Shtëpi e madhe me derë të hapur për të gjithë ata që dëshirojnë me kontribuoj, kjo vlen gjithashtu edhe për znj presidente. Në ditët e ardhshme do të merret vesh edhe kjo pjesë, asgjë nuk ka zyrtare e definitive”, ka thënë Zogaj në emisionin “Ditari” në Tëvë1.
Ai ka thënë se ka individ në LDK që janë kundër kthimit të Osmanit, por ka mohuar se ka grupe të ndara për dhe kundër kthimit të Osmanit.
“Ka një grup që mund të jenë pro dhe të tjerët kundër, janë zëra. Ne këtu po paraqesim qëndrimin politik të LDK-së dhe ai është që jemi të hapur për një përbashkim të madh rreth së djathtës që ta rrisim LDK-në dhe ta kthejmë atje ku ka qenë gjithmonë”, tha ai.
