Një zjarr ka përfshirë mbrëmë një objekt në Zonën Industriale mes Prishtinës dhe Fushë-Kosovës, që i përket kompanisë IPKO. Nga kompania është konfirmuar se janë dëmtuar depot, por falë reagimit të shpejtë të zjarrfikësve dhe ekipeve të brendshme, situata është vënë nën kontroll.
“Po zhvillojmë një vlerësim të brendshëm dhe jemi në bashkëpunim me autoritetet për të përcaktuar shkakun e zjarrit”, thuhet në reagimin e IPKO-s. Ata kanë siguruar se shërbimet dhe infrastruktura nuk janë prekur dhe se operacionet vazhdojnë normalisht.
Edhe Policia e Kosovës ka reaguar për rastin, duke thënë se dëmet materiale janë të konsiderueshme, por fatmirësisht nuk ka të lënduar. “Aktualisht po vazhdojnë hetimet dhe qytetarët luten të shmangin zonën për të mos penguar intervenimin”, tha zëdhënësi i policisë, Agron Borovci.
