Një incident me zjarr ka ndodhur mbrëmjen e së martës në qytetin e Mitrovicës, kur furra e njohur për përgatitjen e perecave, “Adriatiku”, është përfshirë nga flakët. Ngjarja ka ndodhur rreth orës 22:18, në Sheshin e Mitrovicës Jug.
Gjatë përpjekjes për të shuar zjarrin, një kalimtar i rastit, i moshës madhore, ka pësuar lëndime të lehta trupore dhe është dërguar për trajtim mjekësor në emergjencë.
Lajmin e ka konfirmuar për Tëvë1, zëdhënësja e Policisë për rajonin e Mitrovicës, Fexhrije Pllana.
“Me datën 26.08.2025, rreth orës 22:18, në Stacionin Policor Jugu në Mitrovicë është pranuar informata se në Shesh – Mitrovicë Jug është duke u djegur furra ‘Adriatiku’. Në vendin e ngjarjes kanë dalë njësitë policore, zjarrfikësit dhe autoambulanca”, tha Pllana.
Sipas saj, një qytetar që ndodhej pranë vendit të ngjarjes kishte tentuar të ndihmonte në shuarjen e zjarrit, por përfundoi me lëndime të lehta.
“Një kalimtar i rastit i moshës madhore ka tentuar ta fikë zjarrin dhe ka pësuar lëndime të lehta trupore. Ai është dërguar në emergjencë, ku pas marrjes së trajtimit mjekësor është liruar në shtëpi,” shtoi zëdhënësja.
Zjarrfikësit kanë arritur të lokalizojnë dhe shuajnë zjarrin, ndërsa autoritetet po hetojnë shkaktarin e mundshëm të zjarrit.
