Një pallat në qendër të Tiranë është përfshirë nga flakët gjatë ditës së djeshme, duke shkaktuar panik te banorët dhe mobilizim të madh të zjarrfikësve dhe qytetarëve për të ndihmuar në evakuim.
Lidhur me këtë ngjarje ka folur gazetari Martin Marku në emisionin “Ditari” në Tëvë1, duke dhënë detaje mbi rastin.
“Të paktën 11 persona kanë përfunduar në spital, por fatmirësisht ata janë jashtë rrezikut për jetë. Bëhet e ditur se zjarri ka nisur nga një supermarket në katin e parë të pallatit, ndërsa janë dëmtuar deri në 30 banesa, të cilat u përfshinë nga flakët brenda pak sekondash”, ka deklaruar Marku.
Ai shtoi se, përkundër përmasave të zjarrit, nuk ka pasur viktima.
“Fatmirësisht nuk ka humbje jete nga kjo katastrofë që përfshiu një zonë kryesore të Tiranës”, ka thënë ai.
Sipas gazetarit, evakuimi i banorëve ka qenë mjaft i vështirë për shkak të rrezikut të vazhdueshëm gjatë ndërhyrjes.
“Ka qenë shumë e vështirë nxjerrja e banorëve, pasi gjatë kohës kur zjarrfikësit po ndihmonin, binin pjesë metalike dhe fragmente nga objekti, duke rrezikuar edhe jetën e tyre”, ka përfunduar Marku.
