Një zjarr ka shpërthyer sot rreth orës 14:30 në fshatin Rudare, Komuna e Zveçanit, duke shkaktuar dëme të vogla materiale, ka konfirmuar për Tëvë1 zëvendësdrejtori i Policisë për Veriun, Veton Elshani.
Sipas Elshanit, zjarri u përhap me shpejtësi për shkak të erës dhe u afrua pranë një shtëpie, duke dëmtuar pjesërisht murin dhe një kontejner të vendosur afër, por pa depërtuar brenda objektit.
Në vendngjarje ndërhynë zjarrfikësit e Mitrovicës Veriore, të Zveçanit, si dhe me asistencën e zjarrfikësve nga Mitrovica e Jugut, të cilët arritën ta lokalizojnë zjarrin me sukses.
Elshani bëri apel për kujdes të shtuar nga qytetarët, duke theksuar rëndësinë e mos ndezjes së zjarreve në hapësira të ndjeshme dhe shmangien e pirjes së cigares në vende ku mund të shkaktohen zjarre.
“Lusim qytetarët që në rast të zjarreve të lajmërojnë menjëherë Policinë ose Zjarrfikësit për të parandaluar përhapjen e rrezikut,” theksoi ai.
Shkaqet e zjarrit nuk janë bërë ende të ditura, ndërsa autoritetet vazhdojnë hetimet dhe vëzhgimin e zonës për çdo rrezik të mundshëm.
