Vatra të reja zjarri po vazhdojnë të shpërthejnë në territorin e Komunës së Podujevës, duke e përkeqësuar më tej situatën alarmante që po përjeton kjo komunë.
Kryetari i Podujevës, Shpejtim Bulliqi, ka njoftuar se zjarret janë përhapur në disa fshatra përreth Pakashticës, përfshirë edhe Metehin dhe Repën. Ai ka theksuar se situata është shumë serioze dhe paraqet rrezik të madh për jetën dhe pasurinë e qytetarëve.
“Situata është e rëndë dhe kërkon angazhim të përbashkët. U bëj thirrje qytetarëve të këtyre zonave që të bashkëpunojnë me zjarrfikësit dhe policinë, në mënyrë që të parandalojmë përhapjen e mëtejshme të zjarreve dhe të mbrojmë pronat”, ka deklaruar Bulliqi në rrjetet sociale.
Sipas tij, ekipet emergjente janë të angazhuara maksimalisht në terren, me mbështetjen e Agjencisë për Menaxhim Emergjent dhe Forcës së Sigurisë së Kosovës (FSK). Pavarësisht përpjekjeve, përhapja e shpejtë e zjarreve në zona të ndryshme po e vështirëson kontrollin e plotë të situatës.
Vetëm gjatë ditës së djeshme, në Podujevë janë regjistruar nëntë vatra aktive zjarri, duke e vendosur komunën në qendër të një krize të vërtetë mjedisore.
Autoritetet kanë bërë thirrje për bashkëpunim të qytetarëve, shmangie të ndezjeve në natyrë dhe raportim të menjëhershëm të çdo vatre të re zjarri.
