Zjarret kanë përfshirë disa fshatra të Komunës së Suharekës, duke shkaktuar rrezik për banorët dhe pasuritë e tyre. Fshatrat e prekur janë Dubravë, Sallagrazhdë dhe Mushtisht, ku flakët janë përhapur me shpejtësi për shkak të kushteve të thata dhe erërave të forta.
Kryetari i Komunës së Suharekës ka reaguar urgjentisht duke bërë thirrje publike për ndihmë.
“Kushdo që ka mundësi dhe që posedon pajisje për shuarje zjarri, le të ndihmojë në hapësirën Dubravë – Sallagrazhdë – Mushtisht”, ka shkruar ai në një postim në rrjete sociale.
Deri tani, nuk raportohet për të lënduar, por autoritetet lokale janë në terren dhe po punojnë për ta vënë situatën nën kontroll. Komuna i ka bërë apel edhe institucioneve relevante që të angazhohen me kapacitete të shtuara për të parandaluar përhapjen e mëtejshme të zjarrit.
Banorët janë këshilluar të shmangin lëvizjet e panevojshme në zonat e prekura dhe të bashkëpunojnë me ekipet emergjente.
