Drejtoria për Siguri dhe Emergjenca e Komunës së Prishtinës ka vlerësuar si alarmante gjendjen aktuale në Kryeqytet për shkak të shpërthimeve të shumta të zjarreve dhe erërave të forta që po e përkeqësojnë situatën.
Përmes një njoftimi zyrtar në rrjetin social Facebook, kjo drejtori bëri të ditur se është në bashkëpunim të ngushtë me Brigadën Profesionale të Zjarrfikësve, e cila është duke ndërhyrë aktualisht në tetë lokacione të ndryshme.
Sipas njoftimit, rreth 40 zjarrfikës janë angazhuar në operacion, ndërsa lokacionet ku po intervenohet janë:
Rruga C (afër Maxi 24)
Panari
Kosova B
Rimanishtë (2 raste)
Trudë (3 raste)
Milloshevë
Llukar (2 raste)
Bardhosh
“Jemi duke bërë maksimumin për t’u përgjigjur në kohë reale në të gjitha rastet dhe për të mbajtur situatën nën kontroll. Ju lutemi për bashkëpunim dhe mirëkuptim. Shmangni lëvizjet në afërsi të zonave të prekura dhe raportoni çdo rast emergjent në numrat: 0800 122 33 dhe 0800 122 44”, thuhet në reagimin zyrtar të Drejtorisë.
Institucionet apelojnë për kujdes dhe bashkëpunim nga qytetarët, në mënyrë që të shmangen dëmet më të mëdha dhe të garantohet siguria publike.
