Një zjarr ka përfshirë sot një objekt përgjatë magjistrales Mitrovicë–Prishtinë, duke shkaktuar dëme materiale.
Nga ky rast nuk ka persona të lënduar.
Zëdhënësi i Policisë për rajonin e Prishtinës, Enis Pllana, ka konfirmuar se ngjarja është raportuar rreth orës 12:00, ndërsa njësitë policore dhe zjarrfikësit kanë dalë menjëherë në vendin e ngjarjes për të ndërhyrë.
“Sot rreth orës 12:00, është raportuar për një zjarr aktiv në një objekt në magjistralen Mitrovicë-Prishtinë. Policia menjëherë ka dalë në vendin e ngjarjes, po ashtu janë ftuar edhe zjarrfikësit. Nga informatat fillestare nuk raportohet për persona të lënduar. Aktualisht po vijon puna hetimore për sqarimin e plotë të rrethanave që karakterizojnë ngjarjen”, tha ai.
Raportohet se objekti ku shpërtheu zjarri është pronë e deputetit të Lëvizjes Vetëvendosje, Halil Thaçi, i cili aktualisht është kandidat për kryetar të Komunës së Obiliqit.
Shkaqet që çuan në shpërthimin e zjarrit mbeten ende të paqarta, ndërsa ekipet hetimore po punojnë për të përcaktuar rrethanat dhe shkallën e dëmeve.
