Një incident zjarri ka ndodhur sot rreth orës 11:30 në Hajvali, ku një deponi veturash brenda një autoservisi është përfshirë nga flakët.
Lajmin e ka konfirmuar për Tëvë1 zëdhënësja e Policisë për rajonin e Prishtinës, Flora Ahmeti.
“Rreth orës 11:30, është raportuar për një incident zjarri në Hajvali, ku në një autoservis janë përfshirë nga zjarri disa vetura. Policia menjëherë ka dalë në vendin e ngjarjes, po ashtu janë ftuar edhe zjarrfikësit, të cilët kanë arritur lokalizimin e zjarrit,” deklaroi Ahmeti.
Sipas saj, nuk raportohet për persona të lënduar si pasojë e incidentit.
“Aktualisht po vijon puna hetimore për sqarimin e plotë të rrethanave që karakterizojnë ngjarjen,” shtoi ajo.
Autoritetet janë ende në vendin e ngjarjes dhe hetimet po vazhdojnë për të përcaktuar shkakun e zjarrit dhe vlerën e dëmeve të shkaktuara.
