Një zjarr i madh ka përfshirë zonën pyjore mbi fshatin Corroticë në komunën e Preshevës. Lajmin e ka bërë të ditur kryetarja e komunës, Ardita Sinani, e cila ka thënë se flakët janë përhapur me shpejtësi dhe se Shtabi për Situata të Jashtëzakonshme është aktivizuar menjëherë.
Ekipet e zjarrfikësve ndodhen në terren dhe po punojnë për vënien nën kontroll të zjarrit, ndërkohë që është bërë edhe koordinimi me shtabet përkatëse në Vrajë dhe komunat përreth për ndihmë të menjëhershme.
Sinani u ka bërë thirrje banorëve të zonës që të tregojnë kujdes maksimal dhe të ndjekin udhëzimet e autoriteteve. Ajo gjithashtu i ka lutur qytetarët që të mos ndezin zjarre në pyje apo pranë shtëpive dhe të kenë kujdes të shtuar në gjithë territorin e komunës për të shmangur përhapjen e mëtejme të flakëve.
