Edon Zhegrova do të mungoj edhe në këtë xhiro për ekipin francez Lille, që të dielën përballet me Olympique Marseille, në kuadër të javës së 32-të, në Francë.
Për shkak të problemeve muskulore, ylli kosovar do të mungoj edhe në këtë takim mjaft të rëndësishëm të Lillet, kundër skuadrës që synon pozitën e tretë.
Trajneri i Lillet, Bruno Genesio, në konferencën për gazetarë të premten, i ka përmendur katër lojtarë që i mungojnë, derisa ka thënë se kishte pritur që për këtë ndeshje ta kishte të gatshëm edhe Zhegrovën.
“Edoni, të cilin e kishim parashikuar për këtë ndeshje, nuk është ende i gatshëm. Ethan Mbappen e kemi humbur për krejt sezonin, Tiago Santos vazhdon rehabilitimin dhe Diakite Bafo, është i pezulluar”, ka thënë trajneri duke kujtuar mungesat për Marseille.
26-vjeçari Zhegrova, i ka munguar ekipit francez dhe Kombëtares së Kosovës që nga 14 dhjetori i vitit të kaluar kur zhvilloj ndeshjen e fundit në kampionat.
