Ylli i Kombëtares së Kosovës, Edon Zhegrova, të enjten është prezantuar te Juventusi në një konferencë për shtyp.
Zhegrova u transferua te Juventusi nga skuadra e Lillet për 20 milionë euro, dhe me ekipin italian ka firmosur kontratë deri në vitin 2030 me pagë vjetore prej 2.5 milionë eurosh.
Sulmuesi i krahut, ka thënë se është i lumtur që do të jetë pjesë e një skuadre të madhe si Juventusi.
Në fakt, Zhegrova nuk u bashkua me Kosovën për ndeshjet me Zvicrën e Suedinë, pasi qëndroi në Torino për t’u ambientuar te skuadra e re.
“Jam shumë i kënaqur me këto ditët e parë dhe jam mirëpritur nga të gjithë. Jam shumë i lumtur që jam te Juventusi djhe ditët e para ishin fantastike” ka thënë Zhegrova.
Zhegrova ka zbuluar edhe arsyen që e shtyri ti bashkohet Juventusit, ndërsa ka thënë se te klubi italian e njeh mirë Jonathan Davidin, të cilin e kishte bashkëlojtar te Lille.
“Projekti i Juventusit dhe dëshira për të luajtur për një klub të madh më bindën të jem pjesë e këtij ekipi”, tha Zhegrova, që takimin e parë e kishte pasur me Damien Comollin dhe Giorgio Chiellinin.
26-vjeçari ka folur edhe për gjendjen e tij fizike, duke pasur parasysh se që nga dhjetori i vitit të shkuar nuk ka zhvilluar asnjë ndeshje.
Ai ka pranuar se ka kaluar një kohë të vështirë, por tani po ndihet mirë dhe së bashku me stafin e klubit po punon që sa më shpejtë të jetë gati.
Zhegrova ka synime të mëdha me Juventusin, ekip që sipas tij ka shumë cilësi dhe më të cilin synon ta fitoj çdo ndeshje.
Fanellën e parë të Juventusit me numrin 11, Zhegrova do t’ia dhurojë kryeministrit të Shqipërisë, Edi Rama.
“Ai më ka ndihmuar shumë dhe unë do ti jap atij fanellën time të parë”, shtoi Zhegrova duke thënë se përfaqëson të gjithë shqiptarët.
Ai gradualisht po integrohet në grup, pasi të martën ka filluar stërvitjet me ekipin.
Megjithatë, Zhegrova nuk do të debutojë këtë vikend në derbin kundër Interit.
“Kam folur me trajnerin dhe nuk do të luaj ende, pasi më duhet të punoj fizikisht por do ta mbështesë ekipin”, ka përfunduar Zhegrova konferencën e prezantimit të tij.
Ndeshja Juventus – Inter, luhet të shtunën nga ora 18:00 dhe i takon xhiros së tretë në Serie A.
