Pas më shumë se katër vite me ushtrues detyre, është hapur rruga për emërimin e një Kryeprokurori të ri të Shtetit.
Me pesë vota për, një kundër dhe asnjë abstenim, Këshilli Prokurorial votoi që konkursi të hapet më 20 maj dhe të jetë i hapur për 15 ditë.
Vendimin e mirëpriti ish-ministrja e drejtësisë, tash Ushtruese e Detyrës së Presidentes, Albulena Haxhiu.
“Ky veprim i Këshillit Prokurorial të Kosovës rikthen mundësinë për një proces të rregullt, transparent dhe të bazuar në meritë. Është me rëndësi që i gjithë procesi të zhvillohet në mënyrë të paanshme, të besueshme dhe larg çdo ndikimi politik apo interesi të ngushtë”, ka shkruar Haxhiu.
Proces transparent dhe meritor po kërkojnë edhe nga shoqëria civile, të cilët adresuan shumë kritika kur KPK-ja propozoi për kryeprokuror, Blerim Isufajn.
“KPK-ja të mos bëjë gabime të njëjta, të mos përsërit gabimet sikurse në procesin e fundit dhe të garantojë një proces tërësisht transparent, tërësisht në përputhje me rregullativën ligjore dhe që gjithashtu të garantojë një proces meritor të përzgjedhjes së kandidatit për kryeprokuror të shtetit. Mirëpo, duke ditur se ka një koncept dokument të ri sa i përket kandidimit, pres që paneli intervistues t’i merrë për bazë të gjitha sugjerimet që i kemi ofru në koncept dokument”, thotë Vullnet Bugaqku nga KDI.
Fundi i muajit qershor konsiderohet se do të jetë koha kur procesi në KPK do të përmbyllet dhe ky institucion do të dalë me kandidatin tw propozuar për kryeprokuror.
Deri atëherë, vendi më shumë gjasë do të vazhdojë të jetë me ushtrues detyre të presidentes.
Por, kjo vlerësohet se nuk paraqet problem sa i përket dekretimit.
“Fakti që vendi është më ushtrues detyre të presidentit, kjo e fundit nuk ka asnjë kufizim ligjor për sa i përket çështjes së dekretimit eventual të pozitës së kryeprokurorit të shtetit. Natyrisht, kjo do t’i marrë disa javë apo muaj kohë, për faktin se siç dihet konkursi duhet me qenë i hapur, pastaj janë procedurat brenda për brenda Këshillit Prokurorial të cilat duhet të zhvillohen në mënyrë që ta përfundoj procesin KPK, dhe kandidatin/kandidaten që merr mbështetjen e Këshillit duhet ta procedojë për dekretim tek institucioni i presidentit, përkatësisht presidencës së vendit”, thotë avokati Ardian Bajraktari.
Detyrën e kryeprokurorit të shtetit aktualisht po e ushtron Agron Qalaj, pas dorëheqjes sw Blerim Kelmendit
