Hetimet për keqpërdorimet në Byronë Kosovare të Sigurimeve (BSK) janë zgjeruar edhe ndaj 21 personave të tjerë, duke e çuar në 69 numrin e përgjithshëm të të pandehurve që dyshohen për përfshirje në këtë rast.
Sipas njoftimit të Prokurorisë Themelore në Prizren, këta të dyshuar kanë mundësuar ose kanë marrë pjesë në bartjen dhe përfitimin e shumave të të hollave pa mbulesë, në vlera që variojnë nga 2,000 euro deri në 53,000 euro për person.
“Nga veprimet e deritanishme hetimore ekziston dyshimi se këta të pandehur, në kundërshtim me rregullat dhe procedurat e brendshme të BKS-së, kanë mundësuar ose kanë marrë pjesë në bartjen dhe përfitimin e shumave të të hollave pa mbulesë, në vlera që variojnë nga 2,000 euro deri në 53, 000 euro për person, duke shkaktuar një dëm shtesë prej rreth 200,000 euro ndaj Byrosë Kosovare të Sigurimeve”, thuhet në njoftimin e prokurorisë.
Lidhur me rastin, nga Prokuroria bëhet e ditur se janë ngrirë dhe sekuestruar 35 prona, si dhe janë ngrirë 21 llogari bankare të personave të dyshuar.
“Si rezultat i këtyre veprimeve hetimore dhe financiare, sot janë sekuestruar dhe ngrirë gjithsej 35 prona, duke përfshirë parcela kadastrale, njësi banesore dhe njësi garazhuese, të cilat ndërlidhen me tre të pandehurit kryesorë, ndaj të cilëve ekziston dyshimi për përfshirje në veprimet kriminale që kanë shkaktuar dëm të konsiderueshëm financiar ndaj Byrosë Kosovare të Sigurimeve. Gjithashtu, gjatë ditës së sotme Prokuroria në bashkëpunim me Njësitin e Inteligjences Financiar, ka urdhëruar ngrirjen e 21 llogarive bankare të personave të dyshuar”, thuhet tutje në njoftimin e prokurorisë.
Me zgjerimin e hetimeve, sipas Prokurorisë, është rritur edhe vlera e dëmit të shkaktuar, krahasuar me vlerësimin paraprak.
“Me veprimet e identifikuara në fazën fillestare të hetimit, dëmi i shkaktuar ndaj BKS-së ishte vlerësuar në vlerë rreth 1,043,000 euro, ndërsa me zgjerimin e hetimeve dhe identifikimin e veprimeve të reja të dyshuara, është evidentuar edhe një dëm shtesë prej rreth 200,000 euro”, thuhet ndër të tjera në njoftim.
Të dyshuarit, sipas Prokurorisë, janë intervistuar në Stacionin Policor në Prishtinë nga zyrtarët e Njësisë për Hetimin e Krimeve Ekonomike dhe Korrupsionit të Policisë së Kosovës, së bashku me kryeprokurorin e Prokurorisë Themelore në Prizren, zëvendëskryeprokurorin, si dhe një prokuror nga Prokuroria Themelore në Prizren.
Njoftimi i Prokurorisë Themelore në Prizren është vazhdimësi e njoftimit të datës 8 janar 2026, kur, para zgjerimit të hetimeve, të dyshuar ishin 48 persona.
