Në dhjetor këtij viti serbët do t’iu drejtohen sërish kutive të votimit për zgjedhjet parlamentare dhe ato lokale.
Në Serbi ka mbi një dekadë që me pushtetin udhëheq Partia Progresive Serbe në krye me Aleksandar Vuçiq.
Gazetari nga Beogradi, Nikola Kërstiq, nuk pret ndryshime serioze në zgjedhjet e ardhshme, për shkak se, siç thotë ai, kontrollit që e ushtron Partia Progresive Serbe.
“Të them të drejtën nuk pres ndryshime në zgjedhjet e ardhshme në Serbi. Këta të regjimit aktual janë ekspert për ta manipuluar shoqërinë dhe për të vjedhur vota, prandaj jam shumë skeptik. E shoh se ka një energji pozitive në Serbi për ndryshime, por nuk e besoj se kjo do të mjaftoj. Lëreni për një moment Vuçiqin, në zgjedhjet lokale do të marrë pjesë edhe krimineli i luftës, Vojislav Sheshel, imagjinoni? Pyetja ime është se çfarë është duke bërë Bashkimi Evropian, pse ata janë duke heshtur për këtë gjë? Pjesëmarrja e tij në këto zgjedhje është alarmuese. Ky shtet ka nuk pasur demokraci qe 30 vjet, edhe kur pat pak shpresë me Zoran Gjingjiq, sistemi e vrau atë”, tha Kërstiq.
Kurse, Sofija Todoroviq nga shoqëria civile pret disa ndryshime në Serbi në nivelin lokal por jo edhe në atë qendror.
Megjithatë edhe ajo sikurse Kërstiq e sheh si të dëmshme pjesëmarrjen e Vojislav Sheshel në zgjedhjet e ardhshme në Serbi.
“Unë pres disa ndryshime në nivelin lokal në Serbi por jam më skeptike sa i përket nivelit qendror. Nuk besoj se Partia Progesive Serbe do t’i humbas zgjedhjet e ardhshme, por mendoj se fuqia e tyre sadopak do të bie. Ka disa forca pro-evropiane këtu që po bëjnë përpjekje të bëhen bashkë dhe të nxjerrin rezultate më të mira. Megjithatë, për neve si organizatë më së shumti përbën shqetësim pjesëmarrja e Vojislav Sheshelit në këto zgjedhje, i cili ka qenë i dënuar për krime lufte. Glorifikimi i kriminelëve të luftës nuk i bënë mirë imazhit të Serbisë dhe demokracisë. Figura si Shesheli nuk duhet të jenë shembull për gjeneratat e reja këtu e as alternativa politike sepse nuk janë heronj”, tha Todorvoviq.
Në fushatën parazgjedhore, Aleksandër Vuçiq, sërish e ka vënë në fokus Kosovën ku ka deklaruar se nuk ka kush e bind atë për ta njohur pavarësinë e saj.
