Partitë politike i kanë dorëzuar listat në Komisionin Qendror të Zgjedhjeve për zgjedhjet nacionale të 9 shkurtit. Disa me vonesë, e të tjerat me kohë. Por që të gjitha, janë shprehur optimistë që do triumfojnë më 9 shkurt. Megjithatë analistët nuk i shohin si premtuese propozimet e subjekteve. E në to, mungojnë disa emra të njohur në skenën politike.
Ndryshe nga viti 2021-i, listës së Vetëvendosjes i prinë, Albin Kurti, kandidat për kryeministër.
E numrin dy në këto zgjedhje sërish e ka kryetari i Kuvendit, Glauk Konjufca.
Për një numër më lart ka shkuar e para e ministrisë së Punëve të Jashtme dhe Diasporës, Donika Gërvalla.
Për 10 vende më lart ka shkuar shefja e grupit parlamentar të kësaj partie, Mimoza Kusari Lila. (nga numri 18 në 8).
Por, ajo që bie në sy është mos përfshirja në listën zgjedhore të zëvendëskryeministrit të parë, Besnik Bislimi dhe ministrit të Infrastrukturës, Liburn Aliu që në 2021-ten mbante numrin 11-të.
Se pse nuk janë pjesë, nuk kanë treguar nga Zyra e Lëvizjes Vetëvendosje.
Pa përgjigje ka qenë gjatë ditës edhe ministri Liburn Aliu.
Ndryshe prej Vetëvendosjes, nga Partia Demokratike e Kosovës ka ndryshime në numrat e parë.
Nga numri katër në vitin 2021-të, Bedri Hamza tash është bartës i listës.
E numrin e Hamzës këtë vit e ka ish kandidati i kësaj partie për kryeministër, Enver Hoxhaj.
Pas Hamzës, në numrin dy është i pari i kësaj partie, Memli Krasniqi dhe e treta Vlora Çitaku.
E listës së Lidhjes Demokratike të Kosovës këtë herë i prinë i pari i kësaj partie njëherit kandidati për kryeminsitër, Lumir Abdixhiku.
Në numri dy, vazhdon të jetë prapë Kujtim Shala.
Në numrin tre është Doarsa Kica Xhelili, e cila i ndau rrugët me Listën Guxo për t’iu bashkuar LDK-së.
Numrin tre e ka marrë nga Hykmete Bajrami, që këtë herë, ka shkuar për tre numra më poshtë.
Jashtë kësaj liste, LDK-ja e ka lënë Agim Veliun nga Llapi.
Në krahasim me zgjedhjet e kaluara, Aleanca për Ardhmërinë e Kosovës është në koalicion me Nismën që atëherë nuk e kaloi pragun.
Listës i prinë i pari i AAK-së, Ramush Haradinaj që është edhe kandidati për kryeministër, e pasardhës e ka Fatmir Limajn.
Numrin tre e ka prapë deputetja nga kjo parti, Time Kadriaj.
Të gjitha partitë politike në vend pretendojnë që kandidatët e tyre në lista janë fitues të zgjedhjeve të 9 shkurtit.
Mirëpo skeptik për këto pritje është njohësi i çështjeve të politikës, Visar Xani.
Afati për certifikim dhe dorëzim të listës së kandidatëve për deputet ishte deri të mërkurën në orën 16:00, mirëpo disa parti nuk arritën të i dorëzojnë emrat dhe afati u shty për tetë orë, deri në mesnatë.
KQZ e arsyetoi vonesën e disa partive në vështirësinë e përdorimit të platformës online.
