Me datën 3 prill qytetarët serbë do t’iu drejtohen kutive të votimit për zgjedhjet parlamentare dhe ato presidenciale.
Të drejtën për të votuar po e kërkojnë edhe serbët që jetojnë në Kosovë, por që akoma mungon një vendim final nga Institucionet e Kosovës për këtë çështje.
Njohësi i çështjeve juridike, Ehat Miftaraj, thotë se duke pasur parasysh konventat dhe praktikat ndërkombëtare ne raport me minoritetet, duhet t’iu lejohet qytetarëve Serb në Kosovë të votojnë.
Sipas tij, në këtë rast Kosova nuk do të bënte kompromis me Serbinë, po me qytetarët e saj qe kanë shtetësi të dyfishtë.
Se lejimi i zgjedhjeve serbe në Kosovë nuk përbën cenim të sovranitetit e thotë edhe analisti politik Agon Maliqi.
Ai shton se Kosova me këtë akt do fitonte poena politik para miqve të saj ndërkombëtar, e gjithashtu do të kishte një pozicion më të mirë në kuadër të dialogut me Serbinë.
Kujtojmë që më 19 shkurt, institucionet e Kosovës nuk e kanë lejuar mbajtjen e referendumit serb për disa ndryshime në Kushtetutën e Serbisë.
Raporti i gazetarit Shpat Blakçori.
