Basketbollisti Lejson Zeqiri është larguar nga Sigal Prishtina, por jo edhe nga Superliga e Kosovës. Zeqiri do të jetë pjesë e skuadrës së Bashkimit, te e cila u prezantua të enjten.
Zeqiri me Bashkimin ka firmosur kontratë deri në fund të këtij edicioni dhe shihet si përforcim i rëndësishëm për ekipin nga Prizreni.
Zeqiri, i cili luan në pozitën krah-qendër, ka qenë pjesë e Prishtinës prej edicionit të shkuar dhe me këtë ekip e fitoi Superkupën e Kosovës.
Këtë edicion, Zeqiri ka luajtur me një mesatare prej tetë pikëve, katër kërcimeve dhe një asistimi për ndeshje në elitën e basketbollit kosovar.
Bashkimi aktualisht zë vendin e gjashtë në Superligë me 17 pikë të mbledhura pas 13-të xhirove të zhvilluara. Ka regjistruar katër fitore karshi nëntë humbjeve, ndërsa Zeqiri te Bashkimi do të debutojë të shtunën në ndeshjen kundër Pejës.
