Analisti politik, Sadik Zeqiri ka deklaruar se takimet mes partive politike për gjetjen e një emri konsensual për institucionet e vendit është dashur të zhvilloheshin menjëherë pas certifikimit të rezultateve të zgjedhjeve.
Sipas tij, takimet aktuale nuk po zhvillohen me synimin për të arritur marrëveshje, por për të çuar vendin sa më shpejt në zgjedhje të reja.
Ai ka pretenduar se Vetëvendosje po llogarit se në zgjedhjet e ardhshme mund të sigurojë rreth 80 deputetë, së bashku me komunitetet jo-serbe.
“Nuk është dashur fare të shkohet në takime, sepse këto takime është dashur të kryhen menjëherë pas certifikimit të rezultateve, është dashur të xhindet një emër konsensual, këto takime janë duke u bërë për mos me u pajtua dhe me shkua vendi sa më parë në zgjedhje sepse disponimi i VV-së është që vendi të shkojë në zgjedhje, sepse mendon që mund t’i siguroj 80 deputetë bashkë me minoritetet jo serbe dhe është duke llogaritur që mund t’i siguroj 80 deputetë përndryshe është duke e llogaritur pas datës 16 shtator sepse Kurti edhe LDK-në edhe PDK-në edhe Aleancën është duke i mundur me tri palë zgjedhje, ai dëshiron ta ballafaqojë vetën në zgjedhje edhe me ardhjen e Hashim Thaçit në Kosovë dhe atëherë të i hyn edhe njëherë garës, kjo është një prej arsyes që nuk dëshiron të krijojë institucione”, ka deklaruar Zeqiri në emisionin “Ditari” në Tëvë1.
Zeqiri ka thënë gjithashtu se në rast se nuk arrihet një marrëveshje politike, vendi mund të shkojë sërish në zgjedhje pas datës 16 shtator.
Sipas tij, legjislatura e ardhshme mund të arrijë të formojë Kuvendin dhe Qeverinë, por jo edhe të zgjedhë presidentin për shkak të mungesës së një marrëveshjeje politike mes partive.
“Legjislatura e 11-të nuk do të prodhojë institucionet e Kosovës stabile, mund të ketë Kuvend dhe Qeveri po s’do të ketë president, me që nuk ka marrëveshje politike për me qeverisë bashkë dhe për me zgjedh një president të shkohet vendi edhe njëherë në zgjedhje të provohen forcat politike”, tha ai.
Ai ka komentuar edhe emrin e Faton Bislimit, duke thënë se nuk beson se ai do të mund të marrë mbështetjen e nevojshme politike.
“Faton Bislimi nuk e ka respektin në partinë e vet. Ai ka qenë sfidues i Abdixhikut dhe i tjerëve çdo herë. Ai nuk kalon në tavolinë, nuk e ka mbështetjen as të VV-së, sepse ai ka qenë i ekspozuar politikisht”, ka thënë Zeqiri./teve1.info/
