Analisti politik Adrian Zeqiri ka vlerësuar se Paneli Zgjedhor për Ankesa dhe Parashtresa (PZAP) do ta certifikojë Listën Serbe, duke theksuar se certifikimi pas shpalljes së rezultateve zgjedhore është i domosdoshëm.
Në emisionin “Ditari” në Tëvë1, Zeqiri ka deklaruar se Komisioni Qendror i Zgjedhjeve (KQZ) është organ politik dhe si i tillë nuk ka bazë juridike për të mos certifikuar një listë zgjedhore.
Sipas tij, në KQZ nuk ka gjyqtarë që i shqyrtojnë çështjet mbi bazën e drejtësisë, por përfaqësues politikë, prandaj vendime të tilla nuk mund të merren pa mbështetje ligjore.
“Certifikimi pas rezultatit të zgjedhjeve është i domosdoshëm. KQZ-ja është organ politik, që do të thotë se aty nuk ka gjyqtarë që e shqyrtojnë lëndën në bazë të drejtësisë, por përfaqësues politikë. Një organ i tillë nuk mund të mos e certifikojë një listë zgjedhore, pasi nuk ka bazë juridike për një vendim të tillë. E gjithë kjo ka qenë vetëm një lojë politike. Unë besoj se PZAP-ja do ta kthejë Listën Serbe për certifikim, pasi nuk arrihet asgjë konkrete se është njësoj sikur rasti kur nuk aprovohej lista votuese për pjesëmarrje, duke e vonuar vetëm procesin”, ka thënë Zeqiri.
Ndryshe, KQZ-ja kishte përfunduar të premten procesin e rinumërimit të votave, i cili u krye pas dyshimeve për manipulime gjatë numërimit të votave të kandidatëve për deputetë.
Anëtarët e KQZ-së i miratuan listat e kandidatëve të të gjitha partive përveç Listës Serbe, ku tre anëtarë votuan për, dy kundër (nga Lëvizja Vetëvendosje) dhe të tjerët abstenuan.
Ndërkaq, dy ditë pas shpalljes së rezultateve përfundimtare të zgjedhjeve të parakohshme parlamentare të 28 dhjetorit nga Komisioni Qendror i Zgjedhjeve (KQZ), Lista Serbe ka dorëzuar një ankesë në Panelin Zgjedhor për Ankesa dhe Parashtresa (PZAP) kundër vendimit të këtij institucioni për mosmiratimin e listës së kandidatëve të saj.
Në një deklaratë për media, Igor Simiq, përfaqësues i Listës Serbe, e ka cilësuar vendimin si “të paligjshëm, anti-serb dhe diskriminues” dhe ka thënë se KQZ-ja ka mohuar “42.759 vota të serbëve”, duke u munduar të pengojë komunitetin serb të zgjedhë përfaqësuesit e tij.
“Presim që PZAP-ja ta shfuqizojë vendimin e turpshëm të Komisionit Qendror të Zgjedhjeve dhe të marrë një vendim në përputhje me ligjin, me ç’rast do të mbrojë të drejtat e popullit serb, ligjshmërinë dhe integritetin e procesit zgjedhor”, tha Simiq.
