Kryetari i Zubin Potokut, Izmir Zeqiri tha se momentalisht nuk sheh asnjë parakusht që të mbahen zgjedhjet e reja në katër komunat veriore.
Ai tha se e ka përsëritur disa herë që dorëheqja e tyre do të ishte rruga më e drejtë, sesa një shkarkim i mundshëm.
“Momentalisht unë nuk shoh asnjë parakusht që mund të mbahen një palë zgjedhje, sepse nuk po varet as nja vullneti të themi të etnisë shqiptare që banon në këto komuna, e as në vullnetin e Qeverisë së Kosovës. Dmth varet nga një palë tjetër, qysh e përmendem edhe më parë është një ndërhyje e shtetit të Serbisë drejtpërdrejtë për të penguar funksionimin e shtetit të Kosovës…Tani për tani nuk po e shoh ndonjë kusht që mund të mbahen zgjedhjet”, tha Zeqiri në emisionin “Ditari” në Tëvë 1.
“Sa i përket këtij Udhëzimit Administrativ që është iniciuar nga Qeveria është detyre e saj, ndërsa në pyetjen se a do të kishte qenë më mirë shkarkimi apo ndonjë bisedë rreth dorëheqjeve vullnetare, unë gjithmonë kam thënë dhe do të them më mirë do të kishte qenë që të bisedohet për ndonjë dorëheqje vullnetare në qoftë se ka kushte për zgjedhje, nëse nuk ka kot fare mund të veprojmë çfarë do, por mund të hasim edhe në problem edhe më të mëdha sesa që janë, pasi po varet prej daljes së serbëve në zgjedhje në këtë rast presion duhet të jetë i shtuar dhe përfundimtare për Serbinë që të mos përzihet, të mos ndikojë dhe të mos financojë grupe kriminale në Republikën e Kosovës”, shtoi ai.
Ndryshe, pas një marrëveshjeje që arriti Kosova me BE-në më 10 korrik, Zveçani, Zubin Potoku, Leposaviqi dhe Mitrovica e Veriut pritet të shkojnë përsëri në zgjedhje në vjeshtë. /Teve1.info/
