Analisti politik, Ardian Zeqiri, ka deklaruar se opozita në Kosovë ka treguar më shumë maturi dhe institucionalizim në raport me zhvillimet politike në vend, ndërsa ka kritikuar qasjen e partisë në pushtet ndaj institucioneve të pavarura.
Ai tha se ish-presidentja Vjosa Osmani, për shkak të afërsisë politike me kryeministrin në detyrë Albin Kurti dhe bashkëqeverisjes në politikën e jashtme, mbetet figurë interesante në skenën politike.
“Opozita ka qenë reaktive në deklaratat e saja, e ka treguar një lloj maturie dhe institucionalizimi. Edhe atëherë kur partia në pushtet do të duhej ta promovonte institucionalizimin, ka qenë kundër institucioneve të pavarura”, ka thënë Zeqiri.
Sipas tij, në Kosovë tashmë po zhvillohet një garë idesh mes partive politike, pjesërisht si pasojë e zgjedhjeve të shpeshta.
“Osmani duke qenë që ka qenë e afër me Kurtin dhe kanë qeverisur në politikën e jashtme së bashku, mendoj se janë interesante. Opozita ka qenë reaktive në deklaratat e saja, e ka tregu një lloj maturie, një lloj të institucionalizim, edhe atëherë kur partia në pushtet do duhej ta promovonte institucionalizimin ka qenë kundër institucioneve të pavarura…. Është duke u bërë garë e ideve mes partive ndoshta për shkak të përsëritjes së zgjedhjeve të shpeshta. Duhet të ndërrohet qasja e opozitës, partitë politike duhet të kenë njerëz të cilët i këshillojnë që të ndërtojnë kampanjën në rrjetet sociale dhe të godasin em mesazhe të thjeshta. Të jenë shumë agresive me argument e jo me gjuhë ofenduese”, ka deklaruar Zeqiri në emisionin “Ditari” në Tëvë1.
Zeqiri theksoi se për demokracinë dhe pluralizmin në Kosovë nuk do të ishte e shëndetshme që i gjithë pushteti të përqendrohej te një parti e vetme.
“Është e shëndetshme për vendin e Kosovës që shteti të mos mbetet në duar të një njeriu apo të një partie politike, cilado parti po t’i kishte 52% nuk do të ishte e shëndetshme për demokracinë dhe pluralizmin që t’i merr të gjitha postet”, tha ai.
Ai komentoi edhe deklaratat e fundit të zyrtarëve politikë, duke i cilësuar disa prej tyre si nënçmuese ndaj grave në politikë dhe profesioneve të ndershme.
“Numri dy i partisë më të madhe në vend, pa marrë parasysh arsyetimin, ne të gjithë e kemi parë se çfarë ka thënë. Është nënçmuese, nëse jo për presidenten, atëherë për të gjitha gratë që merren me politikë dhe për profesionin e ndershëm të frizerkës. Kjo vjen prej një baze të pamposhtësisë që LVV e ka marrë”, tha Zeqiri./teve1.info/
